Тарғиби имкониятҳои сайёҳии Тоҷикистон дар Фаронса

Душанбе, 05.11.2015. (АМИТ “Ховар”). — 4 ноябри соли 2015 Сафорати Ҷумҳурии Тоҷикистон дар Фаронса чорабинии доир ба муаррифии имкониятҳои сайёҳии кишварро дар Париж барпо намуд. 
Дар рафти ин чорабинӣ, ки бо ҷалби Вазорати корҳои хориҷӣ, ҳайати дипломатӣ, мутахассисони соҳа ва ширкатҳои сайёҳии кишвари иқомат анҷом пазируфт, рӯнамоӣ (презентатсия) оид ба ҳолат ва дурнамои рушди соҳаи туризм дар Тоҷикистон ва имкониятҳои ҷалби бештари сайёҳон, хусусан аз Фаронса ва дигар кишварҳои Аврупо мавриди баррасӣ қарор гирифт, навори видеоӣ оид ба Тоҷикистон ба мазҳари ом гузошта шуд, инчунин руқъаҳо ва дигар маводи таблиғотӣ байни иштирокчиёни чорабинӣ мунташир гардид. 
Дар партави ҷашни 3000-солагии Ҳисор, авлавиятҳои сиёсати ҳифз ва рушди осорҳои фарҳангии кишвар, ки аз ҷониби Ҳукумати ҷумҳурӣ матраҳ гардидаанд, эълом гаштанд. 
Пас аз анҷоми рӯнамоӣ мубоҳисаи касбӣ дар фазои созанда сурат гирифт ва иштирокдорони чорабинӣ имкон доштанд, ки ба суолҳои худ посухҳои муносиб гиранд.
Дар интиҳои маърака таомҳо ва хӯришҳои миллии Тоҷикистон низ ба ҳозирин пешниҳод гардиданд.