«Ваҳдати миллӣ ҳамчун ҷузъи андешаи миллӣ»-мизи гирд дар МТС

Душанбе, 12. 11. 2015. (АМИТ «Ховар»).- Маркази тадқиқоти стратегии назди Президенти Ҷумҳурии Тоҷикистон ва Маркази исломшиносӣ дар назди Президенти Ҷумҳурии Тоҷикистон 13 ноябр дар мавзўи «Ваҳдати миллӣ ҳамчун ҷузъи андешаи миллӣ» мизи гирд баргузор хоҳад кард. 
Дар чорабинӣ аз ҷониби иштирокдорон масъалаҳои сулҳу субот, андешаи миллӣ, роҳҳои густариши андешаи миллӣ, ҷойгоҳи институтҳои ҷомеаи шаҳрвандӣ дар таҳкими андешаи миллӣ ва дигар масъалаҳои вобаста ба таҳкими ваҳдати миллӣ мавриди муҳокима  қарор хоҳанд гирифт.
Баргузории чунин ҳамоиш дар мавзўи ваҳдати миллӣ дар шароити мураккаб шудани фазои сиёсии минтақа ва ҷаҳон, қувват гирифтани қувваҳои «ваҳдаткуш», ки ба муҳити дохилии кишварҳо, аз ҷумла Тоҷикистон бетаъсир нестанд, муҳим ва саривақтӣ мебошад. Беш аз ин, вазъи мавҷуда дар кишварҳои рў ба рушд масъалаи ташаккули андешаи миллиро хусусияти ҳатмӣ мебахшад. Бо назардошти муҳимияти хоси масъала ва тақдирсоз ба шумор рафтани ваҳдати миллӣ, Маркази тадқиқоти стратегӣ ва Маркази исломшиносӣ  иқдоми баргузор намудани мизи гирдро пеш гирифтаанд.