459 зарардидаи заминларзаи Бадахшон ба ҷойҳои амн кӯчонида шуданд

Душанбе, 14.12.2015. (АМИТ «Ховар»). -Бино ба иттилои котиби матбуоти  Кумитаи ҳолатҳои фавқулодда ва мудофиаи гражданӣ Ориф Нозимов, дар айни замон роҳи нақлиётгарди самти Рўшон — Бартанг то 95 км (байни деҳаҳои Чадуд ва Япшорв) кушода аст. Дар ин мавзеъ 2  техника ва гурӯҳҳои ихтиёрӣ барои тоза намудани роҳ аз сангрезаҳо фаъолият намуда истодаанд. Ҳамагӣ дар ин самт 12 техникаю механизмҳои махсус, 1 мошини боркаш ва 1 мошини сабукрави хизматии роҳсозон сафарбар шудаанд.
Гурўҳи корӣ аз Ҳукумати Ҷумҳурии Тоҷикистон бо роҳбарии муовини сарвазири ҷумҳурӣ Азим Иброҳим, муовинони раиси Кумитаи ҲФ ва МГ-и назди Ҳукумати Ҷумҳурии Тоҷикистон полковник М Салимзода ва Ҷ.Маҳмадзода дар водии Бартанг қарор дошта, аз ҷамоати деҳоти Савноб дидан намуда истодаанд.
Тибқи  маълумоти дастрасгардида, аз 11 декабр тавассути чархболҳо зарардидагон аз деҳаҳои дурдаст ба маркази ноҳия оварда шуда, дар муассисаҳои мактабӣ ва томактабии ноҳия ҷойгир карда шудаанд.
Аз 11 то 13 декабр ҳамагӣ 459 нафар, аз онҳо 240 кӯдак ва 219 калонсол кӯчонида шуданд.