«Ҷаҳон муқобили ВНМО»-машварати илмӣ

Душанбе, 4.12.2015. (АМИТ «Ховар»).- Бахшида ба Рӯзи байналмиллалии мубориза бар зидди  ВНМО (СПИД)  3 декабр  дар филиали Донишгоҳи давлатии Маскав ба номи М.Ломоносов дар шаҳри Душанбе таҳти унвони «Ҷаҳон муқобили ВНМО» бо иштироки устодону донишҷӯён семинари илмию тарбиявӣ доир гардид. 
Дар семинар доир ба бемории пайдошудаи норасоии масуният аз тарафи номзади илмҳои тиб Аъзамҷон Мирзоев маърӯза шунида шуд. 
Гуфта шуд, ки сирояти  вируси норасоии масунияти одам  қувваи муҳофизавии баданро заиф мегардонад.  ВНМО ба ҳуҷайраҳои муайяни системаи қувваи муҳофизавӣ таъсир мерасонад. 
Зикр шуд, ки ВНМО бемории сирояткунандаи бисёр хавфнок буда,  сироят кардани ангезандаи он дар шароити ҳозира, ки усули самарабахши муолиҷа ва пешгирии махсуси он вуҷуд надорад, сабаби марги инсон мешавад.