Қабули савганди ҳарбӣ дар Отряди сарҳадии «Ҳамадонӣ»-и қӯшунҳои сарҳадӣ

Душанбе, 03.12.2015. (АМИТ “Ховар”). — 2 декабри соли 2015 дар Отряди сарҳадии «Ҳамадонӣ»-и вилояти Хатлон маросими тантанавии қабули Савганди ҳарбӣ барои зиёда аз 100  сарбози навдаъват барпо гардид. Дар он муовини аввали фармондеҳ — сардори Сарситоди қӯшунҳои сарҳадии КДАМ ҶТ полковник Ҳабибулло Сафаров, намояндагони ҳукумати ноҳияҳои Ҳамадонӣ, Фархор, кормандони сохторҳои амният, Прокуратура, ВКД, падару модарони навдаъватшудагон, ҳайати шахсии Отряди сарҳадӣ ва дигар меҳмонон иштирок намуданд.
Сардори Сарситоди қӯшунҳои сарҳадии КДАМ ҶТ полковник Ҳ. Сафаров ва дигар иштирокдорон зикр намуданд, ки имрӯз сарҳадбонони тоҷик бо  рӯҳи баланд ва ҳисси мардонагиву ватандӯстӣ марзи кишварро ҳифз менамоянд: «Мо низ барои боз ҳам дар сатҳи баланд тарбия ва тайёр намудани афсарону сарбозон саҳму кӯшиши зиёд мекунем, ки сазовори бовари роҳбарияти Ҳукумати Ҷумҳурии Тоҷикистон ва мардуми шарифи Тоҷикистон бошем. Мо бовар дорем наваскароне, ки имрӯз Савганди ҳарбиро қабул менамоянд, ба халқу Ватани маҳбубашон вафодор мемонанд».
Дар ин бора Муҳаммад Улуғхоҷаев, сардори Маркази матбуоти 
Сарраёсати қӯшунҳои сарҳадии  КДАМ Ҷумҳурии Тоҷикистон  хабар дод.