Ашт: «Мо дар атрофи Шумоем, Пешвои миллат!»

Ашт, 25.12.2015. (АМИТ «Ховар»). —   Дар маркази ноҳияи Ашт- шаҳраки Шайдон бахшида ба қабули Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ — Пешвои миллат» роҳпаймоӣ баргузор гардид.
Дар роҳпаймоӣ бо шиори «Мо дар атрофи Шумоем, Пешвои миллат!» кормандони корхонаву ташкилот, муассисаҳо, одамони касбу кори гуногун ва наврасону ҷавонон иштирок намуданд.
Баъдан дар варзишгоҳи марказии ноҳия муовини раиси ноҳия Ҷалилӣ Аниса Абдуллозода дар назди иштирокдорони чорабинӣ зикр намуд:  «Мақоми қонунгузори кишвар аз номи халқи мамлакат расман эътироф намуд, ки Президенти Ҷумҳурии Тоҷикистон Эмомалӣ Раҳмон зимни фаъолияти сиёсиаш ба ҳайси Сардори давлат тавассути талошҳои пайгирона барои таъмини амнияту якпорчагии кишвар, сулҳу салоҳ ва хидматҳои беназираш дар ҷодаи фароҳам овардани шароити арзандаи зиндагӣ ва фаъолияти ҳар шахс ва шаҳрванд дар қалби мардум ҳамчун Пешвои миллат маъво гирифтааст, ки ин боиси ифтихори ҳар як фарди ватандӯст буда, мардуми ноҳияи мо низ аз қабули он фараҳманд мебошанд».