Ба Қонун «Дар бораи мубориза бар зидди терроризм» илова ворид гардид

Душанбе, 18.12.2015.(АМИТ «Ховар»).- Имрӯз дар иҷлосияи чоруми Маҷлиси миллии Маҷлиси Олии Ҷумҳурии Тоҷикистон даъвати панҷум Қонуни Ҷумҳурии Тоҷикистон «Оид ба ворид намудани илова  ба Қонуни Ҷумҳурии Тоҷикистон «Дар бораи мубориза бар зидди терроризм» мавриди баррасии аъзои палатаи болоии кишвар  қарор гирифта, ҷонибдорӣ гардид.
Раиси Кумитаи МММО ҶТ оид ба таъмини асосҳои конститутсионӣ, ҳуқуқу озодиҳои инсон, шаҳрванд ва қонуният Худоёрзода Бахтиёр Тавар  ин масъаларо тавзеҳ дода, зикр кард, ки мақсад аз ворид намудани илова ба қонуни мазкур таъмини амнияти шаҳрвандони  Ҷумҳурии Тоҷикистон,  ҳамчунин мусоидат ба фаъолияти субъекти мубориза бо терроризм, баргузории амалиёти зиддитеррористӣ  дар қаламрави кишвар ва минтақаҳои ҷудогонаи он мебошад.
Мувофиқи илова ба қонуни номбурда минбаъд бо дархости субъекти асосии бевоситаи мубориза бар зидди терроризм хизматрасонии алоқаи барқӣ   ва истифодаи воситаҳои вобаста ба он дар минтақаи гузаронидани амалиёти зиддитеррористӣ, инчунин дар тамоми қаламрави кишвар ё минтақаҳои алоҳида метавонад муваққатан боз дошта шавад.