Бандари Антверпен аз сабаби таҳдиди таркиш кӯчонида шуд

Душанбе, 07.12.2015. (АМИТ «Ховар»). Дар бандари Антверпени Белгия таҳдиди таркиш эълон шуд. Пас аз расидани хабаре, ки гӯё дар бандар маводи тарканда гузошта шуда бошад, тақрибан садҳо кормандони яке аз корхонаҳои логистикӣ ва инчунин ду иншооти саноатии наздик ба майдони ҳодисаи эҳтимолии фавқулода кӯчонида шуданд.
Бино ба иттилои «РИА Новости», кормандони пулис маводи таркандаро ҷустуҷӯ доранд.
Дар Аврупо пас аз ҳамлаҳои террористии Париж ба ҳама гуна таҳдиди террористӣ хеле ҷиддӣ муносибат мекунанд.
Силсилаи ҳамлаҳои террористӣ дар Париж рӯзи 13 ноябр сурат гирифт. Он вақт ҳамлаҳо  дар гулгаштҳои Шарон ва Волтер, кӯчаҳои Фонтен-о-Руаю Алибер ва варзишгоҳи «Стад де Франс» ба амал омаданд. Ғайр аз ин, террористон дар толори консертии «Батаклан» одамонро гаравгон гирифтанд. Бар асари ин амалҳои террористӣ 130 нафар ҳалок гашта, наздики 350 тани дигар ҷароҳат бардоштанд.