Чорабинӣ оид ба пешгирии нашъамандӣ дар Хуҷанд

Суғд, 02.12.2015. (АМИТ «Ховар») -Дар Маркази таълимии «Ҳаёти нав»-и шаҳри Хуҷанд чорабинии омӯзишӣ оид ба пешгирии амали номатлуби нашъамандӣ бо иштироки масъулони соҳа ва кормандони масъули мақомоти иҷроияи шаҳри Хуҷанд баргузор гардид. Дар чорабинии мазкур масъалаи пешгирии сӯистифода аз истеъмоли маводи нашъадор мавриди баррасиву таҳлил қарор дода шуд. Аъзои Шӯрои ҳамоҳангсозӣ оид ба пешгирии сӯйистифода аз истеъмоли маводи нашъадор, гурӯҳи ҷамъиятии ташаббускор, ҳамчунин сардори бахши кор бо ҷавонон, варзиш ва сайёҳии шаҳр Бахтиёр Исматҷонов, раиси Шӯрои занони шаҳр Муҳайё Дадобоева, котиби масъули комиссияи кор бо ноболиғони назди МИҲД -и шаҳр Мадина Салимова ва дигарон фикру мулоҳизаҳои хешро оид ба кам намудани сафи нашъамандон, хусусан пешгирии пайвастани ҷавонон ба сафи ин тоифа баён намуданд. Зикр гардид, ки дар қаламрави шаҳр 6 гурӯҳи ташаббускори ҷавонон оид ба пешгирӣ намудани нашъамандӣ амал мекунад.