Дар Нигерия бар асари ҳамлаи террористӣ 30 нафар ҳалок шуда, 65 тани дигар ҷароҳат бардошт

Душанбе, 29.12.2015. (АМИТ «Ховар»). – Имрӯз дар қисмати шимолу шарқии Нигерия дар маркази маъмурии иёлати Борно дар масҷиде бо истифода аз маводи тарканда ҳамлаи террористӣ ба амал омад, ки дар натиҷа 30 нафар ҳалок шуда, 65 тани дигар ҷароҳат бардоштанд.

Полиси иёлати Борно ин маълумотро тасдиқ кард. Ба гуфтаи кормандони мақомоти ҳифзи ҳуқуқ, таҷҳизоти тарканда дар дохили масҷид гузошта шуда буд. Фавтидагону осебдидагони ҳамлаи террористӣ ба беморхонаи наздиктарин бурда шуданд. Ба гуфтаи табибон, аллакай ҷасади 30 нафар ҳалокшуда ва 65 нафар маҷрӯҳро овардаанд.

То ин дам ҳеҷ яке аз гурӯҳҳои террористӣ масъулияти ин амали мудҳишро бар дӯш нагирифтааст.