«Дарахти дӯстӣ» дар Кумитаи ҷавонон, варзиш ва сайёҳӣ

Душанбе, 17.12. 2015. (АМИТ «Ховар). — Имрӯз бо шинонидани “Дарахти дӯстӣ” дар боғи назди Кумитаи ҷавонон, варзиш ва сайёҳӣ Амалиёти ҷумҳуриявии ҷавонон оид ба ниҳолшинонӣ оғоз ёфт. Ҷавонони ҷумҳурӣ, ки аз минтақаҳои гуногун барои иштирок дар семинар дар пойтахт ҷамъ омаданд, дар оғози Амалиёти ҷумҳуриявӣ фаъолона иштирок намуданд.
Аҳтам Абдуллозода, раиси Кумитаи ҷавонон, варзиш ва сайёҳӣ ҳамроҳи ҷавонони ҷумҳурӣ як дарахти мевадиҳандаро дар боғи назди кумита шинонида, бо мақсади боз ҳам муттаҳид намудани ҷавонон онро рамзан “Дарахти дӯстӣ” ном гузошт.
Роҳбари ҷавонони мамлакат зимни оғози Амалиёти ҷумҳуриявии ҷавонон оид ба ниҳолшинонӣ аз ҳамаи ҷавонон даъват ба амал овард, ки дар амалиёти мазкур ширкати фаъолона варзида, дар ободонию бунёдкорӣ ва созандагию сабзазоркунии мамлакат саҳми худро гузоранд.
Таъкид шуд, ки мақсад аз  амалиёт бедор кардани ҳисси миллию ватандӯстиии ҷавонону наврасон ва ба ин васила тарбияи онҳо дар рӯҳияи меҳнатдӯстию созандагӣ мебошад.
Масъулини кумита изҳор доштанд, ки Амалиёти ҷумҳуриявии ҷавонон оид ба ниҳолшинонӣ дар доираи тавсеа бахшидан ба корҳои ободониву созандагӣ дар партави дастуру супоришҳои Президенти мамлакат Эмомалӣ Раҳмон сурат мегирад.  
Амалиёти мазкур бори аввал набуда, минбаъд низ идома меёбад.