Фархор: Ҷаримабандии 350 нафар барои вайрон кардани муҳити зист

Фархор, 31.12.2015. (АМИТ «Ховар»). -Масъулини бахши ҳифзи муҳити зисти ноҳияи Фархор дар давоми соли 2015 521 санҷиш гузаронида, дар натиҷа нисбат ба 350 нафар, ки қоидаҳои амалкунандаи ҳифзи муҳити зистро вайрон намудаанд, санади маъмурӣ тартиб дода, ба маблағи 26 760 сомонӣ ҷаримабандӣ карда, ба буҷаи маҳаллӣ ворид намуданд. Ба қавли сардори бахши мазкур Аҳлиддин Ҳаитов аксари ҷаримашудагон вобаста ба самтҳои ҳифзи ҳаво, об, замин, канданиҳои фоиданок, наботот, ҳайвонот, паррандагон ва дигар амалҳое, ки ба халал расонидани муҳити зист мансубият доранд, равона шудааст. Манбаъ афзуд, барои дар амал тадбиқ намудани қонунҳои табиат, ҳифзи наботот ва ҳайванот масъулин бо соҳаи маориф алоқамандии зич дошта, байни хонандагони муассисаҳои таълимӣ оид ба мавзуъҳои «Паррандагон- дӯсти одамон», «Об манбаи ҳаёт», «Табиатро ҳифз намоед» ва дигар мавзӯъҳое, ки ба ҳифзи табиат шомиланд, озмун мегузаронанд.