Гумрук: Фаъолияти шӯро дар ҳайати нав

Душанбе, 01. 12. 2015. (АМИТ «Ховар») — Дар Хадамоти гумруки назди Ҳукумати Ҷумҳурии Тоҷикистон бо иштироки кормандони мақомоти гумрук,  масъулини вазорату идораҳои дахлдор, соҳибкорону тоҷирони ватанӣ, ассотсиатсияҳои миллии соҳибкории хурду миёна ва брокерони гумрукӣ  ҷаласаи Шӯрои ҷамъиятиву машваратӣ баргузор гардид. Дар он  фаъолияти шӯро дар ҳайати нав, масъалаҳои ташкилии фаъолияти он, тағйироту иловаҳо дар санадҳои меъёрию ҳуқуқии танзимкунандаи фаъолияти гумрукӣ (дохилшавии Ҷумҳурии Тоҷикистон ба Конвенсияи Киото), фаъолияти брокерони гумрукӣ ва иштирокдорони фаъолияти иқтисодии хориҷӣ мавриди таҳлилу баррасӣ қарор гирифтанд. 
-Шӯрои ҷамъиятию машваратӣ доир ба фаъолияти гумрукӣ дар назди Хадамоти гумруки назди Ҳукумати Ҷумҳурии Тоҷикистон бо мақсади татбиқи банди 14-и моддаи 467 Кодекси гумруки Ҷумҳурии Тоҷикистон таъсис шуда, мақсади  он ҳамчун мақоми ҷамъиятию машваратӣ  пеш аз ҳама, мусоидат ва  ҳамкории созандаи мақомоти гумрук бо аҳли тиҷорат ва саноат дар таҳия ва татбиқи сиёсати гумрукии  Ҷумҳурии Тоҷикистон бо мақсади таъмини ҳифзи манфиатҳои иқтисодии мамлакат ва ташкили шароитҳои мувофиқ барои фаъолияти соҳибкорӣ, такмили сохтори амалиёти содиротию воридотӣ ва ҷалби сармояи хориҷӣ мебошад, — гуфт сардори Хадамоти гумруки назди Ҳукумати Ҷумҳурии Тоҷикистон Абдуфатоҳи Ғоиб.