Ироқ хуруҷи неруҳои Туркияро аз қаламрави худ талаб кард

Душанбе, 05.12.2015 (АМИТ «Ховар»). -Ҳукуматдорони Ироқ хуруҷи фаврии неруҳои Туркияро аз қаламрави худ талаб карда, интиқоли неруҳои туркиро ба минтақаи Башикаи наздикии шаҳри Мосул вайрон кардани соҳибихтиёрии худ хонданд. Вазорати корҳои хориҷии Ироқ амали Туркияро «ба зурӣ зада даромадан» хонда, имконияти гузаронидани ҳар гуна амалиёти низомиро бе мувофиқа бо Бағдод рад кард.

Чанде қабл иттилоъ дода шуд, ки Туркия дар доираи барномаи омӯзиши ҷангиёни курдӣ 130 сарбозашро дар Башика ҷойгир кардааст. Ба гуфтаи намояндагони неруҳои ҳарбии ИМА, Туркия неруҳояшро мустақилона ба шимоли Ироқ интиқол дода, ин иқдомро берун аз доираи амалиёти эътилофи байналмилалӣ, ки бар зидди ДОИШ мубориза мебаранд, қабул кардааст. «ИМА медонанд, ки Туркия садҳо неруи худро дар шимоли Ироқ ҷойгир кардааст, аммо ин иқдом як  қисмати амалиёти эътилоф таҳти роҳбарии ИМА нест», — гуфтаи ду нафар низомии амрикоиро иқтибос меорад ТАСС бо ишора ба Агентии «Reuters».