Исфара: Занҳои хонашин ба кор ҷалб мешаванд

Душанбе, 07.12.15. (АМИТ «Ховар»). -Ташкили марказҳои атласбофию адрасбофӣ боиси бо ҷойи кори доимӣ таъмин гардидани занони маҳаллӣ мегардад. Бино ба гуфти мудири бахши кор бо занон ва оилаи мақомоти иҷроияи ҳокимияти давлатии шаҳри Исфара Гавҳархон Ҳамроева туфайли ба фаъолият оғоз бахшидани ин гуна марказҳо дар шаҳру деҳоти Исфара 88 нафар занону духтарон ба кор ва коромӯзӣ ҷалб  шудаанду ин нишондод дар ҳоли афзоиш мебошад.
Аз рӯи маълумоти Нурулло Қурбонов, сардори Раёсати Агентии меҳнат ва шуғли аҳолӣ дар шаҳри Исфара тавассути баргузор кардани бозори ҷойҳои корӣ дар давоми соли 2015-ум 38 нафар занону духтарон соҳиби ҷойи кори доимӣ гаштаанду теъдоди зиёди онҳо ба курсҳои омӯзишӣ фарогир гаштаанд. Теъдоди занони аз Раёсати Агентии меҳнат ва шуғли аҳолӣ дар шаҳри Исфара танҳо дар давоми соли 2015 қарзи имтиёзнок гирифта 39 нафарро дарбар мегирад.