Конфронси илмӣ бахшида ба 80- солагии зодрӯзи А. Исҳоқов

Душанбе, 18.12.2015 (АМИТ «Ховар»).- 17- уми декабр дар  Академияи илмҳои Ҷумҳурии Тоҷикистон бо дастгирии Раёсати Академияи илмҳо ва Институти таърих, бостоншиносӣ ва мардумшиносии ба номи Аҳмади Дониши АИ ҶТ бахшида ба 80 — умин солгарди зодрӯзи бостоншиноси маъруф, доктори илмҳои таърих, профессор Абдуллоҷон Исҳоқов дар мавзӯи “Саҳми Абдуллоҷон Исҳоқов дар рушди бостоншиносии тоҷик” конфронси илмӣ баргузор гардид. 
Конфронсро ба ин муносибат ноиби президенти АИ ҶТ, академик Кароматулло Олимов ифтитоҳ бахшид, сарвари пойгоҳи бостоншиносии Панҷакент — Саразм Абдурауф Раззоқов дар мавзӯи “Кашшофи деҳшаҳри Саразм”, узви вобастаи АИ ҶТ Юсуфшоҳ Ёқубов дар мавзӯи “Абдуллоҷон Исҳоқов кашшофи дизи Панҷакенти қадим”, доктори илмҳои таърих Саидмурод Бобомуллоев дар мавзӯи “Саҳми Абдуллоҷон Исҳоқов дар такмили таърихи халқи тоҷик” маърӯза намуданд. 
Ҳамчунин дар конфронс зимни маърӯза гуфта шуд, ки: «Тадқиқоти бостоншиносии куҳандизи Панҷакенти қадим барои Абдуллоҷон Исҳоқов имтиҳони бузурге буд, зеро сохтори биноҳои куҳандиз аз бинои шаҳрнишину деҳнишини суғдиён ба куллӣ фарқ менамуд. 
Бозёфт шудани маркази нави маданияти аҳди қадими кишоварзии Саразм дар саргаҳи Зарафшон аз тарафи устод Абдуллоҷон Исҳоқов, кашфиёти нодир дар илми бостоншиносии ҷаҳон буд.