Консепсияи рушди оила дар Ҷумҳурии Тоҷикистон қабул гардид

Душанбе, 30.12.2015. (АМИТ «Ховар»). — Таҳкими пояҳои оила аз самтҳои афзалиятнок дар сиёсати иҷтимоии давлат ба ҳисоб рафта, Президенти мамлакат бо назардошти муҳимияти масъала соли 2015-ро Соли оила эълон намуд, ки ҳадаф аз он боло бурдани мавқеи оила дар ҷомеа, густариши фарҳангу маърифати оиладорӣ, инчунин нигоҳ доштани он ҳамчун арзиши ивазнашаванда дар фарҳанги миллӣ мебошад.
Бо назардошти вазъи мавҷуда Консепсияи рушди оила дар Ҷумҳурии Тоҷикистон аз ҷониби гурўҳи кории Кумитаи кор бо занон ва оилаи назди Ҳукумати Ҷумҳурии Тоҷикистон таҳия шуд, ки дурнамои сиёсати давлатро дар самти таҳкими оила ҳамчун ниҳоди муҳими иҷтимоӣ ва асоси ҷомеа муайян месозад.
Консепсия масъалаҳои вобаста ба заминаҳои қонунгузории ҳифзи манфиатҳои оила ва такмили он бо назардошти замони муосир, оила ҳамчун ниҳоди иҷтимоӣ ва макони тарбияи фарзанд, заминаҳои иқтисодию иҷтимоии таҳкими оила, баланд бардоштани маърифати оиладорӣ ва таҳкими пояҳои оиладорӣ, инчунин танзими оила ва солимии репродуктивиро дар бар мегирад.
Татбиқи Консепсия фаъолияти дастаҷамъонаи тамоми вазорату идораҳо, ташкилоти ҷамъиятӣ ва тамоми ҷомеаро тақозо менамояд.
Бо назардошти нақши калидии оила дар таъмини суботу ҳамдигарфаҳмӣ, ваҳдату якдилӣ дар ҷомеа, пешгирии ҷалби ҷавонон ба гурўҳу ҳаракатҳои ифротию террористӣ, таъсири манфии василаҳои иттилоотӣ ба тарбияи дурусти фарзандон, қабули Консепсияи мазкур ҳуҷҷати муҳим дар самти тақвияти фаъолияти ниҳодҳои давлатӣ ва ҷомеаи шаҳрвандӣ хоҳад гашт.
Бо дарки муҳимияти падидаи оила дар ташаккул ва пешрафти давлат ва ҳифзи арзишҳои фарҳанги миллӣ баъди ба даст овардани Истиқлолияти давлатӣ дар сатҳи Конститутсияи (Сарқонуни) Ҷумҳурии Тоҷикистон принсипи кафолати ҳимояи давлатии оила ҳамчун асоси ҷамъият ва амалишавии ҳуқуқи ҳар шахс ба ташкили оила қувваи конститутсионӣ касб намуд.
Дар радифи ин меъёри конститутсионӣ аз солҳои аввали касби истиқлол таҳкими заминаҳои ташаккули оила ва дастгирии оилаҳо бо назардошти арзишҳои фарҳанги миллӣ аз самтҳои афзалиятноки сиёсати давлатӣ эътироф шуда, аз ҷониби давлату Ҳукумати кишвар дар ин самт корҳои муайян анҷом дода шуданд.
Дар баробари ин, суръат гирифтани равандҳои ҷаҳонишавӣ тақозо менамояд, ки арзишҳои асосии фарҳанги оиладории тоҷикӣ ҳифз шаванд.