Корвони саломатӣ-меҳмони хизматчиёни ҳарбӣ

Душанбе, 7.12.2015. (АМИТ «Ховар»).-Корвони саломатии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба афсарону аскарони Маркази таълимии қӯшунҳои сарҳадии Кумитаи давлатии амнияти миллии Ҷумҳурии Тоҷикистон, воқеъ дар ноҳияи Фирдавсии шаҳри Душанбе хизмати босифати тиббӣ расонид. Дар ҳайати корвон беш аз 45 мутахассиси варзидаи соҳа аз муассисаҳои зертобеи вазорат, табибони гӯшу гулӯ ва бинӣ, духтурони чашм, дандон, дилу рагҳои хунгард, урологҳо, табибони пӯст, силшинос, роҳи нафасу ҷоғар ва диабет, асабшиносон, табибони бемориҳои дарунӣ ширкат варзида, қариб 900 нафар хизматчиёни ҳарбиро аз ташхис гузаронида, маслиҳату табобати ройгон пешниҳод карданд. Беш аз 50 номгӯй доруворӣ барои онҳо дастрас  шуд. Табибон бо дастгоҳҳои фавқуссадо, сабти барқии кори дил, флюрографӣ, дастгоҳҳои ташхиси чашм, гӯш, гулӯ ва бинӣ вазъи саломатии сарбозону аскаронро муайян намуданд. Ба хотири тарғибу ташвиқи ташаккули тарзи ҳаёти солим аз ҷониби мутахассисон суҳбату маслиҳатҳои муфид ва варақаҳои иттилоотӣ пешкаш шуданд.