Кумаки кишоварзон ба мактаб-интернати ноҳияи Ёвон

Душанбе, 28.12.2015. (АМИТ «Ховар»).- Вазорати кишоварзии Ҷумҳурии Тоҷикистон сарпараситии Мактаб-интернати ҷумҳуриявӣ барои кўдакони ятиму бепарастор ва аз оилаҳои камбизоати ноҳияи Ёвонро ба уҳда дорад ва ҳамасола дар арафаи ҷашну идҳо ба хонандагону тарбиягирандагони мактаб-интернати мазкур кумаки моддӣ мерасонад. Ин навбат муовини вазири кишоварзии Ҷумҳурии Тоҷикистон Ҷ.Саидова аз номи роҳбарияти вазорат барои баланд бардоштани савияи дониши тарбиягирандагони мактаб-интернати ноҳияи Ёвон тахтаи  электронӣ, ки арзиши зиёда аз 5 ҳазор сомониро дорад, тақдим намуд.
Дар айни замон дар мактаб-интернат 236 нафар хонандаю тарбиягиранда ба таълиму тарбия фаро гирифта шуда, аз ин шумора 2 нафар ятими кулл, 148 нафар нимятим буда, 86 нафари дигарро хонандагон аз оилаҳои камбизоат ташкил медиҳанд.
Таълимгирандагони мактаб-интернат дар соли хониши 2015 ба як зумра дастовардҳои назаррас ноил гардиданд, аз ҷумла дар озмуни “Оби тоза ва муҳити солим” Муҳайёи Мусулмонзода сазовори дипломи дараҷаи 1 ва дар ҳаҷми 500 сомонӣ мукофотпулӣ барои “Мақолаи беҳтарин”, Хушнуд Маҳмадраҳимов сазовори дипломи дараҷаи 2 ва маблағи 300 сомонӣ барои “Тадқиқоти беҳтарин” ва Абубакр Холов сазовори дипломи дараҷаи 3, маблағи 200 сомонӣ мукофотпулӣ барои “Меъмории беҳтарин” сарфароз гардидонида шуданд.