Лимупарварӣ дар Кӯлоб

 Кӯлоб, 19.12.2015. (АМИТ «Ховар»). –Лимупарварӣ тайи чанд соли охир дар минтақаи Кӯлоб рушд намуда, истеҳсоли ин маҳсулот алакай дар бозори дохилӣ бо нархи нисбатан арзон ба фурӯш гузошта мешавад. Сокини ҷамоати деҳоти Даҳанаи ноҳияи Кӯлоб Суратмо Шакармадова 10 сол боз ба парвариши ниҳоли субтропикии лиму машғул аст. Чанд сол қабл ин маҳсулотро аз хориҷи кишвар ба Тоҷикситон ворид менамуданд, акнун бо заҳмати ҳамешгаии хоҷагидорон воридоти он ба кишвар пурра ҷилавгирӣ шудааст. Ба иттилои масъулин барои парвариши лиму минтақаи Кӯлоб, бахусус шаҳру деҳоти он, ноҳияи Восеъ, Фархор ва Ҳамадонӣ хеле мувофиқ аст, зеро ҳарорати гармӣ нисбат ба дигар ноҳияҳо фарқкунанда мебошад. Аз ин рӯ, мутахассисон парвариши лимуро дар хоҷагиҳои минтақа бамаврид ҳисобидаанд. Аҳли заҳмати ҷамоати деҳоти Даҳанаи ноҳияи  Кӯлоб бо назардошти сердаромад будани бахши лимупарварӣ барои таъмини кори соҳа дар асоси тавсияи мутахасисон дар гармхонаҳо шумораи зиёди ниҳоли лимуро парвариш доранд, ки дар оянда майдони гармхонаҳои лимуро зиёд ва содироти он ба берун аз кишвар роҳандозӣ мешавад.