Ғончӣ: мулоқоти судманд бо хонандагон

Душанбе, 4.12.2015. (АМИТ «Ховар»).-Дар ноҳияи Ғончӣ мулоқоти роҳбарони муассисаҳои олии вилоят бо хатмкунандагони макотиби таҳсилоти ҳамагонӣ сурат гирифт. Рустам Ҷӯраев — раиси ноҳияи Ғончӣ иқдоми ҳукумати вилояти Суғдро барои тарғибу ташвиқи дастовардҳои донишгоҳ нек арзёбӣ карда, онро имкони беҳтарин барои интихоби дурусти ихтисос ва касби ояндаи довталабон унвон намуд.
Намояндаи мақомоти иҷроияи ҳокимияти давлатии вилояти Суғд Мирзотоҳир Набиев зикр намуд, ки бо дастури раиси вилояти Суғд Абдураҳмон Қодирӣ ин чорабинӣ сурат гирифта, барои хатмкунандагони муассисаҳои таҳсилоти ҳамагонӣ кумаки амалӣ барои дохил шудан ба муассисаҳои таҳсилоти олии мамлакат мебошад. 
Ректори Донишгоҳи давлатии Хуҷанд ба номи академик Бобоҷон Ғафуров Анвар Мақсудов гуфт, ки тамоми ихтисосҳои замони муосир ва рӯзмарра дар донишгоҳи онҳо мавҷуданд. ДДХ ба номи академик Бобоҷон Ғафуров имконот, захира ва пойгоҳи муқтадири таълимиву тарбиявӣ дорад ва барои тарбияи мутахассисони баландихтисос саъйи комил менамояд. Дастоварди як соли охири донишгоҳ гувоҳи он шуда метавонад.
Хатмкунандагон доир ба вазъи таҳсил, шароити хобгоҳҳо, номгӯйи ихтисосҳо, маблағи шарномаҳо ва дигар имтиёзоту муқаррарот ба ректорони донишгоҳу донишкадаҳо суолҳо дода, ҷавобҳои қаноатбахш гирифтанд.