Қонуни сарнавиштсоз-паёмбари қалбҳо

Душанбе, 11.12.2015. (АМИТ «Ховар»). — Дар Федератсияи иттифоқҳои касабаи мустақили Тоҷикистон бо иштироки кормандони дастгоҳ ва ташкилоти соҳавии иттифоқи касаба маҷлиси машваратӣ баргузор шуд. Иштирокдорони нахуст ба қабули Қонун «Дар бораи Асосгузори сулҳу ваҳдати миллӣ- Пешвои миллат» таваҷҷуҳ карданд. Раиси федератсия Салимзода Шерхон Одина таъкид дошт, ки ин қонуни сарнавиштсоз паёмбари қалбҳои мардуми Тоҷикистон аст. Дар асл мардум хеле барвақт ба Сарвари давлат ин номро сазовор дониста буданд. Хуб шуд, ки маъвои дили мардуми Тоҷикистон ба ҳукми қонун даромад. Ширкаткунандагони дигар низ қабули ин қонунро барои шинохти миллате, ки фарзандони баруманди худро қадр мекунад, иқдоми саривақтӣ ва муҳим донистанд. 
Дар ташкилоти ҳамузви федератсия низ ин қарорро хуб пазируфтанд ва барои таҳкими истиқлолияти давлатӣ,  рушди ҷомеа ва боло бурдани ҳувияти миллӣ муҳим донистанд. 
Дар ин бора аз хадамоти матбуоти Федератсияи иттифоқҳои касабаи мустақили Тоҷикистон ба АМИТ «Ховар» хабар доданд.