Роғун: ҷалби духтарони бекор ба курсҳои кўтоҳмуддати касбомўзӣ

Роғун, 1.12.2015. (АМИТ «Ховар»). -Бо мақсади иҷрои «Барномаи давлатии тарбия, интихоб ва ҷобаҷогузории кадрҳои роҳбарикунандаи Ҷумҳурии Тоҷикистон аз ҳисоби занону духтарони лаёқатманд барои солҳои 2007-2016» дар шаҳри Роғун 573 фаъолзан дар мансабҳои гуногун  дар мақомоти иҷроия, ҷамоатҳои шаҳраку деҳот, ташкилоту муассисаҳои шаҳр фаъолият доранд, ки аз ин шумора  199 нафараш дар мансабҳои роҳбарикунанда фаъолият мекунанд. Имрўзҳо намояндагони занон дар маҷлиси вакилони халқи шаҳр 3 нафар ва дар маҷлиси вакилони шаҳраку деҳот 11 нафаранд. Дар муассисаҳои таҳсилоти олии пойтахт ҳоло 110 донишҷў тавассути квотаи президентӣ таҳсил менамоянд, ки 50 нафари онҳоро духтарон ташкил медиҳанд. 
Дар нўҳмоҳи соли 2015 баҳри амалӣ намудани «Барномаи давлатии тайёр кардани мутахассисон аз ҳисоби занон ва мусоидат ба шуғли онҳо барои солҳои 2012-2015» дар маркази дўзандагии шаҳр 87 нафар занон ва ҷавондухтарони бекор ба курсҳои кўтоҳмудати касбомўзӣ ҷалб  шудаанд. 
Имрўзҳо корҳои хонагӣ аз ҳисоби занон рушд ёфта, сатҳи зиндагии  аҳолӣ хубтар гардида истодааст. Зиёда аз 150 нафар зан ба корҳои либосдўзӣ, нону кулчапазӣ, бофтани ҷӯробу жемперҳо, заргарӣ, муҳракашӣ, гулдӯзии миллӣ ва сӯзанидӯзӣ машғул мебошанд.