Санкт-Петербург: мошини пулисро зери ҳамла қарор доданд

Душанбе, 04.12.2015. (АМИТ «Ховар»). -Дар шимолу шарқи шаҳри Санкт-Петербурги Русия рӯзи ҷумъа, 4-уми декабр, шахсони номаълум аз силоҳи автомат ба сӯи мошини пулис тир холӣ карданд. Қурбоншудагон низ ҳастанд. Дар ин бора манбаъ аз мақомоти қудратии шаҳр ба ТАСС иттилоъ додааст. 
«Тақрибан соати 11-и субҳ дар кӯчаи Муринск 2 шахси номаълум бо ашёи монанд ба автомат ба УАЗ-и пулис тир кушоданд. Бино ба маълумоти пешакӣ, 2 нафар пулис ҳалок гашта, 1 тани дигар ҷароҳат бардоштааст», — мегӯяд манбаъ.
Дар Раёсати тафтишотии вилояти Ленинград ин ҳодисаро тасдиқ карда, иброз намуданд, ки ҳанӯз ба онҳо оид ба қурбониёни ин ҳодиса маълумот дастрас нашудааст. Ба ҷои ҳодиса гурӯҳи тафтишотӣ сафарбар гардид.