«Соли 2016-соли маҳалла, деҳа ва шаҳраки обод»-барномаи вилоятӣ

Суғд, 18.12.2015 (АМИТ «Ховар»).-Бо мақсади рушди иқтисодиёт ва иҷтимоиёти маҳал, густариши корҳои созандагиву бунёдкорӣ, ободонию сабзазоркунӣ, ҳифзи муҳити зист, босамар ва мақсаднок истифода бурдани неъматҳои табиат, беҳтар намудани фаъолияти муассисаҳои тиб, маориф, фарҳанг, баланд бардоштани нақш ва фаъолнокии аҳолӣ дар ҳаёти ҷамъиятӣ Барномаи вилоятии «Соли 2016-Соли маҳалла, деҳа, ва шаҳраки обод» роҳандозӣ гардид.
Тибқи ин қарор ҳамчунин ҳайати комиссия ва низомномаи комиссияи озмуни вилоятии «Маҳалла, деҳа ва шаҳраки обод» тасдиқ шуд. Озмуни маҳалла, деҳа ва шаҳраки беҳтарин дар байни се воҳиди марзии аҳолинишин шаҳрак, деҳа ва маҳалла барои гирифтани унвони беҳтарин гузаронида мешавад. Дар асоси қарори раиси вилоят мукофотонии ғолибон дар арафаи таҷлили Рӯзи Истиқлолияти Ҷумҳурии Тоҷикистон сурат мегирад.