СПАШ ба ҳамлаи пайвандӣ дар кишварҳои иттиҳод посухи низомӣ ваъда додааст

Душанбе, 02.12.2015 (АМИТ «Ховар») .- Ҳуҷумҳои  пайвандӣ (гибридные нападения) метавонанд боиси ба амал омадани  моддаҳо оид ба мудофиаи дастаҷамъонаи СПАШ   (НАТО) гарданд. Ин нуктаро Дабири кулли Иттиҳоди  Атлантикаи Шимолӣ  Йенс Столтенберг  дар як нишасти хабарӣ дар Брюссел дар рӯзи аввали мулоқоти вазирони корҳои хориҷии кишварҳои Созмони Паймони Атлантикаи Шимолӣ (СПАШ)  баён дошт. Дар ин бора ТАСС хабар медиҳад.
«Мо қарор додем, ки ҳуҷумҳои пайвандӣ метавонанд боиси ба амал даровардани моддаи панҷуми Аҳдномаи вашингтонии СПАШ гарданд”,- гуфт дабири кулли созмон. Моддаи панҷум посухи ҳарбии тамоми иттиҳод ба таҷовуз бар зидди яке аз кишварҳои аъзоро дар назар дорад, шарҳ медиҳад оҷонсӣ.
Дар консепсияи иттиҳод истифодаи ҳамзамони се таркиби сиёсати амниятӣ — омӯзиш, боздоштан ва мудофиа баррасӣ гардидаанд, изҳор дошт Столтенберг. «Таҳдидҳои  пайвандӣ  доираи хеле васеи таҳдидҳоро дарбар мегиранд, бинобар ин ба СПАШ  доираи хеле васеи имкониятҳо зарур аст, то   худро дифоъ кунад», — илова намуд мавсуф.
Истилоҳи “ҷанги пайвандӣ» дар ИМА охири асри ХХ ба миён омад. Он дорои  якчанд тафсири  гуногун аст, ки асосан чунин маънидод мешавад: ҷанги пайвандӣ дар худ омезиши муноқишаи муқаррарию мусаллаҳона бо истифода аз усулҳои террористӣ (масалан, дастгоҳҳои худсози тарканда) ва усулҳои ҷангҳои иттилоотӣ (масалан киберҳуҷумҳо)-ро таҷассум мекунад.