Суҳбати ҷонфизо дар «Фарҳангдӯст»

Душанбе, 10.12.2015. (АМИТ «Ховар»).- Дар Донишкадаи молия ва иқтисоди Тоҷикистон маҳфили навбатии донишкадавии «Фарҳангдӯст» бо иштироки профессор Абдунабӣ Сатторзода доир гардид. 
Тавре ки котиби матбуоти донишкада Машҳура Абдуллоева хабар дод, дар маҳфил перомуни мавзӯи «Адабиёти бадеӣ унсури муҳими ташаккули фарҳанги маънавӣ» сухан рафт, ки мазмуну муҳтавои онро асосан маънавиёт фаро гирифт. Профессор А. Сатторзода аз дастовардҳои соҳаҳои мухталиф ёдовар шуда, аз ҳама беш комёбиҳои адабиёти бадеиро дар мадди аввал гузошт. Бо ёдоварӣ аз андешаҳои фарҳангии бузургони дорои дараҷаи ҷаҳонӣ адабиётро болотар аз адабиёт хонд.
Ҳамчунин дар боби сифатҳои одами зиёӣ ва расидан ба ҳадди инсони комил андеша ронда, се омил — сиёсӣ, иқтисодӣ ва фарҳангиро асоси рушди ҷомеа арзёбӣ кард.