Суғд: Тақдими 10 ҳазор сомонӣ мукофот ба ҳунарманде, ки 50 шогирд омода месозад

         Душанбе, 07.12.2015. (АМИТ «Ховар)  -Дар шаҳри Хуҷанд  маросими тантанавии супурдани шаҳодатномаву дастгоҳҳо  ба  бонувони ҳунарманд доир гардид, ки дар он   бофандаҳо аз тамоми шаҳру навоҳии вилоят  ширкат варзиданд. 
         Дар  соли равон дар ҷамоати шаҳраку деҳоти шаҳру навоҳии вилоят  102 маркази таълимию истеҳсолӣ ташкил шуда, бо 316 дастгоҳи матоъбофӣ таъмин гардиданд, ки   дар онҳо  139   устоди соҳибҳунар ба  900  шогирд ҳунарҳои аҷдодиро меомӯзанд. Бояд гуфт, ки дастгоҳҳои бофандагӣ  серсоҳа буда, дар онҳо 12 намуди матоъ бофта мешавад. То имрӯз аз ҷониби бонувони ҳунарманди вилоят 6 ҳазору 77 метр матоъ истеҳсол шудааст, ки наздик ба 2000 метри он ба фурӯш рафтааст. 
Раиси вилоят  Абдураҳмон Қодирӣ ба бонувоне, ки аллакай дар ҷодаи бофандагӣ таҷрибаи кофӣ пайдо кардаанд, 84 дастгоҳ ва ба 10  хатмкардаи марказҳои таълимию истеҳсолӣ шаҳодатнома супорида, таъкид намуд, ки ҳадафи асосии иқдоми мазкур- эҳёи ҳунари бостонии бофандагӣ ва соҳибкасб гардонидани занҳои хонашин аст, ки шумораашон дар вилоят ба 230 ҳазор нафар мерасад.
         Абдураҳмон Қодирӣ ҳамчунин мужда расонид, ки дар соли 2016 ба ҳунарманде, ки 50 шогирд тайёр мекунад, 10 ҳазор сомонӣ мукофот хоҳад дод ва афзуд, ки  дастгоҳҳои тақдимшуда имкон медиҳанд, ки занҳои маҳаллӣ на танҳо ҳунари атласу адрасбофиро аз худ кунанд, балки ба истеҳсоли матоъҳои дигар низ машғул шаванд. Дар ин радиф ҳар маҳал метавонад мувофиқ ба талаботи сокинон ин ё он намуди ҳунари бофандагиро ривоҷ диҳад.