Тарафдории сокинони Файзобод аз мақоми Пешвои миллат

Файзобод, 16.12.2015 (АМИТ «Ховар»).- Сокинони ноҳияи Файзобод барои ҷонибдории  қабули Қонуни Ҷумҳурии Тоҷикистон «Дар бораи асосгузори сулҳу ваҳдати миллӣ- Пешвои миллат» дар маркази ноҳия  ҳамоиш доир намуданд. Дар он муовини раиси ноҳия Сайбинисо Раҷабзода, роҳбарони ташкилоту муасисаҳо, кормандони дастгоҳи раиси ноҳия, ҷавонон, кормандони соҳаҳои  маориф, тандурустӣ, кишоварзӣ ва аҳли ҷамъият  ширкат варзиданд.  Сайбинисо Раҷабзода гуфт, ки  қабули қонуни мазкур  амри воқеист, зеро он ормони миллатамон буда, баҳри хизматҳои  фарзанди  сазовору сарсупурдаи миллат, ки зиндагии хушу осудаи  ҳамватанон барояш дар ҷойи аввал қарор дорад, амрест зарурӣ. Хусусан онҳое, ки аз ватан фирор намуда, дар мулкҳои бегона дар хорию залилӣ қарор доштанд, дар симои Эмомалӣ Раҳмон  наҷотдиҳандаи  худро дарёфта, ба ватан баргашта ба зиндагии  осоишта  оғоз намуданд.
 Инчунин намояндагони  бахши кор бо занон ва оилаи ноҳия, сархатиб ва собиқадорони меҳнат аз хизматҳои  арзандаи  Сарвари давлат ёдовар шуда,  қонуни мазкурро ҷонибдорӣ карданд.