“Театр дар меҳмонии кӯдакон”- чорабинии фарҳангӣ-хайриявӣ

Душанбе, 25.12.2015. (АМИТ «Ховар»). — Имрӯз дастгоҳи марказии Ҳизби Халқии Демократии Тоҷикистон дар асоси дастуру супоришҳои роҳбари ҳизб, Президенти кишвар — Эмомалӣ Раҳмон бахшида ба истиқболи Соли нави мелодии 2016 дар мактаб-интернати махсуси таҳсилоти асосии №3 шаҳри Душанбе чорабинии фарҳангӣ-хайриявиро таҳти унвони “Театр дар меҳмонии кӯдакон” бо иштироки ҳунарпешагони театри бачагонаи “Лӯхтак” баргузор намуд. 
Ҳайати эҷодии театр барномаи ҷолиберо ба кӯдакон намоиш дода, хотири онҳоро болида намуданд. Дар фарҷоми намоиш ба ҳамаи кӯдакони ин муассисаи таълимӣ шириниҳо ва туҳфаҳо тақдим гардид. Бино ба гуфтаи Абдураҳмон Хонов,  роҳбари Дастгоҳи марказии Ҳизби Халқии Демократии Тоҷикистон бо ибтикори кумитаҳои иҷроияи Ҳизби Халқии Демократии Тоҷикистон дар ҳамаи вилоят ва шаҳру ноҳияҳо чунин чорабиниҳои фарҳангӣ — хайриявии ҷолиб ва хотирмон баргузор шуда истодаанд. Дар аксари чорабиниҳои доиргардида ба кӯдакони ятиму эҳтиёҷманд ва маъюб туҳфаҳо супорида шуданд. Бояд гуфт дар давоми сол ба беш  аз 1000 оилаи камбизоат, ятимону бепарасторон, хона-интернатҳои кӯдакони ятим аз тарафи ташкилоти ибтидоӣ, аъзои фаъоли ҲХДТ кумаки моддиву молиявӣ дар арафаи иду ҷашнвораҳо расонида шудааст.