Ҳукми суди вилояти Хатлон нисбат ба 8 сокини ноҳияи Шаҳритус

Душанбе, 04.12.2015. (АМИТ «Ховар»). -Суди  вилояти Хатлон  парвандаи ҷиноӣ нисбат ба 8  сокини ноҳияи Шаҳритусро баррасӣ намуд.  Айбдоршавандагон барои овезон кардани парчами гурӯҳи террористии «Давлати Исломӣ» дар ноҳия айбдор  мешаванд. Тавре ки   ба  АМИТ «Ховар»  судяи суди вилояти Хатлон Маҳмудзода  Зубайдулло  Асо  иттилоъ  дод, нафарони гумонбар  барои ҷалби шаҳрвандон ба  амалиёти  ҷангӣ,  сарнагун кардани ҳокимияти давлатӣ айбдор мешаванд. Амали худро ин нафарон шаби 10  ба  11  августи соли равон иҷро кардаанд. Ҳамзамон ин гурӯҳ  ният дошт даст  ба  дигар амалҳои  террористӣ занад, аммо аъзои он дастгир шуданд.  Бо қарори суди вилояти Хатлон нисбат ба аъзои ин гурӯҳ  ҳукм аз  7  то 27  сол  бароварда  шуд.  Айбдоршавандагон  бо иштирокдорони муҳорибаҳо дар Сурия    ба  воситаи Интернет  дар тамос  будаанд.  
Ҳамсуҳбати   хабарнигори АМИТ «Ховар»  ҳамзамон зикр  кард, ки  қарори суд ҳоло  ҳукми қонунӣ нагирифтааст  ва  айбдоршавандагон 8  нафар  будаанд, на  7  нафар,- тавре  ки  дигар расонаҳо итттилоъ  додаанд.