Вохӯрии Сайдулло Хайруллоев ва Ли Ок Рён

Душанбе, 11.12.2015 (АМИТ «Ховар»).- Раиси Раёсати Ҷамъияти дӯстӣ ва равобити фарҳангии Тоҷикистон бо кишварҳои хориҷӣ (XДРФТ) Сайдулло Хайруллоев раиси Ҷамъияти дӯстии Ҷумҳурии Корея бо кишварҳои Осиёи Марказӣ хонум Ли Ок Рёнро ба ҳузур пазируфт. Дар ҷараёни мулоқот масъалаи тарғиботи ҳамкории дуҷониба дар доираи фаъолияти ҷамъиятҳои ҳарду кишвар баррасӣ гардид. 
Сайдулло Хайруллоев дар бораи фаъолияти XДРФТ ва ҷамъиятҳои он  маълумот дода, изҳор дошт, ки ҳоло 23 ҷамъияти дӯстӣ бо кишварҳои гуногуни хориҷӣ амал мекунанд. Ҷамъияти дӯстии «Тоҷикистон — Корея» намунаи барҷастаи ин ниҳоди фарҳангӣ ба шумор меравад. Пешниҳод шуд, ки Ҷамъияти дӯстии «Корея — Тоҷикистон» дар кишвари Корея низ ташкил шавад. Таклифи мазкур аз ҷониби раиси Ҷамъияти дӯстии Корея бо кишварҳои Осиёи Марказӣ бо хушнудӣ пазируфта шуд.  
Раиси Ҷамъияти дӯстии Ҷумҳурии Корея бо кишварҳои Осиёи Марказӣ хонум Ли Ок Рён иброз дошт, ки мақсади сафараш ба Ҷумҳурии Тоҷикистон тақвияти ҳамкории фарҳангӣ бо ин кишвари зебои Осиёи Марказӣ мебошад.
Дар интиҳои мулоқот Ёддошти ҳамкорӣ байни Ҷамъияти дӯстӣ ва равобити фарҳангии Тоҷикистон бо кишварҳои хориҷӣ ва Ҷамъияти дӯстии Ҷумҳурии Корея бо кишварҳои Осиёи Марказӣ  ба имзо расид. Санади ҳамкориро раиси Раёсати XДРФТ Сайдулло Хайруллоев ва раиси Ҷамъияти дӯстии Ҷумҳурии Корея бо кишварҳои Осиёи Марказӣ хонум Ли Ок Рён имзо карданд.