Ҳалокати пиёдагардон дар садамаҳои нақлиётӣ

Душанбе, 4.01.2016. (АМИТ «Ховар»).- 1-уми январи соли равон ронандаи мошини тамғаи “Мерседес-Бенс”, сокини 44-солаи шаҳри Кӯлоб, ҳангоми ҳаракат аз шаҳри Кӯлоб ба самти шаҳри Душанбе, дар ҳудуди ҷамоати деҳоти Тугараки ноҳияи Восеъ аз уҳдаи идораи мошин набаромада, ду нафар сокинони 22 ва 27-солаи ноҳияи Восеъро пахш намудааст. Дар натиҷа, пиёдагардон, ҷароҳатҳои вазнини ҷисмонӣ бардошта, дар беморхона бистарӣ гардидаанд. Пас аз чанд муддат ҷавони 22-сола дар беморхона ба ҳалокат мерасад.
2-юми январ ронандаи мошини тамғаи “Газел”, сокини 42-солаи ноҳияи Ҷ.Расулов, ҳангоми ҳаракат аз кӯчаи Ленин ба самти кӯчаи Гагарини ноҳияи мазкур бехатарии ҳаракат дар роҳро риоя накарда, сокини 44-солаи ҳамин ноҳияро пахш намудааст. Дар натиҷа, пиёдагард, ҷароҳатҳои вазнини ҷисмонӣ бардошта, дар беморхона ба ҳалокат расидааст.
Ҳамчунин дар ин рӯз ронандаи мошини тамғаи “Опел-Бечка”, сокини 46-солаи ноҳияи Б.Ғафуров, ҳангоми ҳаракат дар роҳи мошингарди Конибодом-Ғафуров, дар ҳудуди ҷамоати деҳоти Хистеварз сокини 51-солаи ҳамин ҷамоатро пахш намудааст. Дар натиҷа, пиёдагард ҷароҳатҳои вазнини ҷисмонӣ бардошта, дар беморхона ба ҳалокат расидааст.