Тамринҳои хориҷии «Истиқлол» дар Туркия

Душанбе, 26.01.2016 (АМИТ «Ховар»). -Қаҳрамони Тоҷикистон дастаи «Истиқлол»-и шаҳри Душанбе дуюмин ҷамъомади таълимӣ-тамриниро дар шаҳри Анталияи Туркия баргузор мекунад. Тавре ки сомонаи расмии дастаи пойтахт хабар медиҳад, 31-январ дастаи «Истиқлол» ба ҷамъомади хориҷӣ дар Туркия, ки то 14 феврал идома меёбад, сафар хоҳад кард. Дар давоми ҷамъомади дуҳафтаина дастаи «Истиқлол» дар меҳмонхонаи «Корвонсарой» маскан гирифта, марҳилаи дуюми омодагӣ ба мавсими бозии навро мегузаронад. Дар ҷараёни ҷамъомад дастаи «Истиқлол» чор бозии назоратӣ бо дастаҳои хориҷиро дар нақша дорад. Дастаи «Истиқлол» қабл аз сафар ба Туркия бо дастаи «Хуҷанд» бозии санҷишӣ мегузаронад. Ин вохӯрӣ 29 январ, рӯзи ҷумъа, соати 14:00 дар Варзишгоҳи марказии ҷумҳуриявии шаҳри Душанбе барпо мегардад. Ёдовар мешавем, ки ду бозии гузашта байни дастаҳо дар Қайроққум баргузор шуда, бо натиҷаҳои 1:1 ва 2:2 анҷом ёфт.