Арзу шикоятҳои шаҳрвандон ба Суди Олӣ афзудааст

Душанбе, 18.01.2016.(АМИТ «Ховар»).-«Дар соли сипаригардидаи 2015 ба Суди Олии кишвар 2 ҳазору 655 арзу шикоятҳои шаҳрвандон ва эътирозҳо ворид гардидаанд, ки дар қиёс ба соли 2014 -ум 305 адад ё 13 фоиз зиёд мебошад»,- гуфт Шермуҳаммад Шоҳиён- раиси Суди Олии Ҷумҳурии Тоҷикистон имрӯз дар ҷамъи хабарнигорон. Мавсуф афзуд, ки аз шумораи умумии 2 ҳазору 412 шикояти баррасишуда 1130 адади он ба омӯзиши парвандаҳо марбут буда, 243 шикоят мавриди баррасӣ қарор дорад. Аз теъдоди шикоятҳои ҳаллу фаслгардида 1057-тоаш ба парвандаҳои гражданӣ, 472 адад ба парвандаҳои оилавӣ, 852-то ба парвандаҳои ҷиноятӣ ва 31 адади он марбут ба парвандаҳои ҳуқуқвайронкунии маъмурӣ мебошанд.
Шермуҳаммади Шоҳиён афзоиш ёфтани арзу шикоятҳои шаҳрвандонро ба Суди Олии кишвар ба баланд гардидани маърифати ҳуқуқии онҳо рабт дода, таъкид кард, ки ба Суди Олии ҷумҳурӣ бо арзу шикоят муроҷиат намудани шаҳрвандон ва масъалагузорӣ намудани мушкилоти худ дар Додгоҳи Олии кишвар ҳуқуқи конститутсионии ҳар як шаҳрванд аст.