Аз зилзилаи Шарора 27 сол сипарӣ гардид

Душанбе, 23.01.2016.(АМИТ «Ховар»).-Имрӯз 23 январ аз зилзилаи мудҳиши Шарора 27 сол сипарӣ гардид. Субҳи 23 январи соли 1989 соати 5:02 дақиқа дар маҳаллаҳои Шарора, Сарчашма (собиқ Оқулии Боло) ва Сайёд (Оқулии Поён) заминҷунбӣ ва фурӯ рафтани замин рух дод.
Заминларзаи Шарора ба 1952 хоҷагии ноҳияи Ҳисор зарари калон расонида, 4, 5 ҳазор оиларо бесарпаноҳ кард, 4512 манзил, 53 мактаб, 24 муассисаи тиббӣ, 2 боғча, 8 мағоза ва як ошхона, 45 километр хати барқ, 50 километр хати радиотелефон, 7 километр хати шабакаи обрасонӣ, 15 километр роҳ, 14 километр шабакаҳои обёркунӣ, 9 клуб ва як китобхона, 5 бинои маъмурӣ ва як ферма хисороти ҷиддӣ диданд.
Дар маҷмӯъ аз ин зилзилаи мудҳиш беш аз 15 ҳазор одамон бе манзил гардиданд. Бо кумакҳои ҳукумат ва ҷомеа оқибатҳои фалокатбори зизлила ботадриҷ бартараф карда шуданд. Аз он рӯзҳои мудҳиши зилзилаи Шарора 27 сол пур гардид. 2 апрели соли 1993 маҳаллаи Шарора бо қарори Шӯрои Вазирони Ҷумҳурии Тоҷикистон ба шаҳрак табдил дода шуд ва он алҳол яке аз шаҳракҳои пешрафта ва ободи ноҳияи Ҳисор маҳсуб меёбад.