Бештари донишҷӯёни КМТ аз Душанбе мебошанд

Душанбе, 25.01.2016. (АМИТ «Ховар»).-«Соли хониши 2015 ба комиссияи қабули Консерваторияи Миллии Тоҷикистон ба номи Т. Сатторов 126 довталаб ҳуҷҷат супорида, 124 нафари онҳо ҳамаи имтиҳонҳои дохилшавиро супорида, ба комисияи мандатӣ тавсия шуданд, ки қисми бештари довталабонро сокинони ш. Душанбе ташкил медиҳанд». Ин нуктаро имрӯз, 25 январ ноиби ректори Консерваторияи Миллии Тоҷикистон Бурҳон Сайфуддинов зимни нишасти матбуотии ин ниҳод иброз кард.
Номбурда зикр намуд, ки шумораи донишҷӯёни таҳсили рӯзона 112 нафар ва ғоибона 12 нафарро ташкил медиҳад. Қабули донишҷӯён аз минтақаҳо: вилояти Хатлон -25 нафар, вилояти Суғд-21 нафар, вилояти Бадахшон — 8 нафар, шаҳру ноҳияҳои тобеи ҷумҳурӣ -25 нафар ва аз шаҳри Душанбе-46 нафарро ташкил медиҳад.
Бояд гуфт, ки дар консерватория 218 корманд фаъолият дошта, ба 491 донишҷӯи муассисаи мазкур дарс мегӯянд.