Чӣ бояд кард, то хушунат бартараф шавад?

Душанбе, 21.01.2016 (АМИТ «Ховар»).- Бахши кор бо занон ва оилаи мақомоти иҷроияи маҳаллии ҳокимияти давлатии ноҳияи Тоҷикобод, дар ҳамбастагӣ бо бахши оид ба корҳои дин, танзим, анъана ва ҷашну маросими миллӣ бо сокинони ҷамоати деҳоти Қалъаи лаби об дар мавзӯи «Чӣ бояд кард, то хушунат бартараф шавад» вохӯрӣ гузаронид.
Дар вохӯрӣ мудири бахши кор бо занон ва оила, мудири бахш оид ба корҳои дин, раиси ҷамоат, ходимони дин, имомхатибони масҷидҳо ва аҳли ҷамоат иштирок доштанд.
Дар вохӯрӣ таъкид шуд, ки барои дар амал ҷорӣ намудани Қонуни Ҷумҳурии Тоҷикистон «Дар бораи зӯроварӣ дар оила» ҳар як узви оила бояд тадбирҳои зарурӣ андешанд. Қонуни мазкур муносибатҳои ҷамъиятиро вобаста ба пешгирии зӯроварӣ дар оила танзим намуда, вазифаҳои субъектҳои пешгирикунандаи зӯроварӣ дар оиларо доир ба ошкор, пешгирӣ ва бартарафсозии сабаб ва шароити ба он мусоидаткунанда муайян менамояд.
Зуроварӣ дар оила кирдори зиддиҳуқуқии барқасдонаи дорои хусусияти ҷисмонӣ, рӯҳӣ, шаҳвонӣ ё иқтисодӣ мебошад, ки дар доираи муносибатҳои оилавӣ аз ҷониби як узви оила нисбат ба дигар узви оила содир шуда, боиси поймол шудани ҳуқуқ ва озодиҳои ӯ, расонидани дарди ҷисмонӣ ё зарар ба саломатии ӯ мегардад, ё таҳдиди расонидани чунин зарарро ба вуҷуд меорад.