Дар як ҷазираи Япония баъди 115 сол бори аввал барф борид

Душанбе, 25.01.2016.(АМИТ «Ховар»).-Дар ҷазираи Амами-Осимаи Япония баъд аз 115 сол барф борид. Тавре ки Агентии обуҳавошиносии ин кишвар хабар додааст, бори охир бориши барф дар ин ҷазирае, ки ба минтақаи Кагосима тааллуқ дорад, 12-уми феврали соли 1901 ба қайд гирифта шуда буд. Гуфта мешавад дар қисми ҷанубу ғарбии Япония рӯзҳои истироҳатӣ хеле сард шуда, барфрезӣ ба амал омад. Дар қисми ҷанубии ҷазираи Кюсю, ки барф дар он ҷо хеле кам меборад, баландии барф ба 10 см ва дар шаҳри Нагасаки ба 16 см баробар гардид. Ин нишондод барои ҳар ду минтақа рекордӣ мебошад, менависад хабаргузории РИА «Новости». Дар қисми ҷанубии минтақаи Окинаваи Япония сардии ҳаво ба 4,6 дараҷаи таҳти сифр расидааст, ки ин ҳолат низ рекордӣ унвон мегирад. Ҳамчунин ҳодисаи мушобеҳ дар шаҳри Фукуока ба амал омад, ки дар пайи он 11 мошин ба ҳам бархурда, боиси осеб дидани чанд нафар шуд. Қаблан дар мавриди қатъ гардидани парвози 166 хатсайр ба самти шаҳрҳои ҷанубу ғарбии мамлкат хабар доданд. 7 ширкати ҳавопаймоӣ дар сомонаи расмии худ дар мавриди қатъи парвозҳо ба минтақаҳои Кинки, воқеъ дар ҷазираи Сикоку ва Кюсю хабар пахш кардаанд. Обуҳавошиносон иттиллоъ медиҳанд, ки бориши барф имрӯз давом меёбад. Шабонарӯзи охир дар қисми ҷанубу ғарбии Япония бориши барф аз 30 см то 100 см пешбинӣ шудааст. Бориши беисти барф ва сардии ҳаво на танҳо барои обу ҳавошиносони Япония, балки ин ҳолат дар раванди мушоҳидаи метеорологии Амрико низ таърихӣ ба шумор меравад. Гуфта мешавад, рӯзҳои охири ҳафтаи гузашта пойтахти ИМА-ро барфи зиёд фаро гирифта, ғайр аз ин тӯфони барфии “Ҷонас” 11 иёлати Амрикоро фаро печид, ки вобаста ба вазъияти баамаломада ҳукумати мамлакат ҳолати фавкулодда эълон кард. Тӯфон ва пайомадҳои он боиси марги 17 нафар гардид.