Дастгир гардидани ду ҷавон бо гумони ғоратгарӣ

Душанбе, 19.01.2016. (АМИТ «Ховар») — Ба ШВКД-1 дар ноҳияи Сино ҷавонзани 18-солаи шаҳри Душанбе муроҷиат намуд, ки 28-уми ноябри соли 2015 дар кӯчаи Ҷ. Расулови пойтахт шахсони номаълум бо тариқи зӯроварӣ аз ӯ як гарданбанди тиллоӣ ва як телефони мобилии тамғаи “АСЕР”-ро бо маблағи умумии 2500 сомонӣ тасарруф намуда, аз ҷойи ҳодиса ғайб задаанд.
Дар натиҷаи гузаронидани чорабиниҳои фаврӣ-ҷустуҷӯӣ кормандони милитсия сокини 34-солаи шаҳри Душанберо, ки пеш бо моддаи 237 ва 244 Кодекси ҷиноятии Ҷумҳурии Тоҷикистон суд шудааст ва шарики ӯ, сокини 27-солаи ноҳияи Рӯдакиро бо гумони содир намудани ҷинояти ғоратгарӣ дастгир намуданд. Нисбат ба гумонбаршудагон парвандаи ҷиноятӣ оғоз шуда, тафтиш давом дорад.