Дороиҳои “Амонатбонк” нисбат ба соли 2014 ба андозаи 39% афзуд

Душанбе, 19.0.1.2015. (АМИТ «Ховар»).- «Бонки давлатии амонатгузории Ҷумҳурии Тоҷикистон «Амонатбонк» новобаста ба вазъи кунунии таъсири омилҳои беруна ба низоми бонкии ҷумҳурӣ, фаъолияти худро дар соли 2015 ба нишондиҳандаҳои назарраси молиявӣ ҷамъбаст намуд.
Дороиҳои бонк дар соли ҳисоботӣ маблағи 2,5 млрд. сомониро ташкил дода, нисбат ба соли 2014 ба андозаи 39% афзуд. Пардохтпазирии бонк дар сатҳи баланд нигоҳ дошта шуда, маблағҳо сари вақт ба ҳисобҳои дахлдор гузаронида шуданд»,-иброз намуд муовини раиси раёсати БДА “Амонатбонк” Муҳаммадзода Бахтиёр имрӯз зимни нишасти матбуотӣ дар назди хабарнигорон.
Тибқи иттилои масъулини бонк, сармояи умумии бонк дар соли ҳисоботӣ маблағи 249,3 млн. сомониро ташкил дода, нисбат ба соли 2014 12% афзун гардид.
Даромади тавозунии бонк дар соли 2015 то андозбандӣ маблағи 48,9 млн. сомонӣ ва баъд аз андозбандӣ маблағи 30 млн. сомониро ташкил намуд, ки нисбат ба соли 2014 13% зиёд аст.
Тавассути филиалҳои бонк маблағҳои андозу пардохтҳои ҳатмӣ қабул ва ба ҳисобҳои дахлдор гузаронида мешаванд. Ин хизматрасонӣ, ки бевосита барои ғанӣ гардонидани Буҷети давлатии Ҷумҳурии Тоҷикистон нигаронида шудааст, иҷрои босифату саривақтиро талаб менамояд. То имрӯз фаъолияти бонк дар ин самт муътадил нигоҳ дошта шудааст.
Дар соли 2015 3 млрд. сомонӣ аз шахсони воқеӣ ва ҳуқуқӣ аз тариқи нақдӣ беподош андоз ва пардохтҳои ҳатмӣ қабул гардида, ба суратҳисобҳои буҷетҳои ҷумҳуриявӣ ва маҳаллӣ гузаронида шуданд.
Хусусан ба суратҳисобҳои транзитии буҷети давлатӣ андозу пардохтҳои ҳатмӣ ба маблағи 1920 млн. сомонӣ ва маблағҳои саҳмияҳои суғуртаи иҷтимоӣ дар ҳаҷми 1937 млн. сомонӣ ворид шуда, ба суратҳисобҳои марбута сари вақт гузаронида шуданд.
Дар ин давра ба оилаҳои камбизоат барои истифодаи қувваи барқ ва гази табиӣ ҷубронпулӣ дар ҳаҷми 21,9 млн. сомонӣ аз ҷониби Вазорати молияи Ҷумҳурии Тоҷикистон ворид шуда, дастраси оилаҳои камбизоат гардонида шуд.