ДСРТ: Паёми имсола аз паёмҳои қаблӣ ба куллӣ фарқ дошт

Душанбе, 29.01.2016. (АМИТ «Ховар»).- Дар Паёми навбатии худ Асосгузори сулҳу ваҳдати миллӣ, Пешвои миллат, Президенти Тоҷикистон муҳтарам Эмомалӣ Раҳмон, бевосита ба тарбияи ҷавонон, хусусан шомилшавии онҳо ба ҳар гуна ҳизбу ҳаракатҳои иртиҷоӣ диққати махсус дод.
Имрӯз вобаста ба баррасии Паём дар Донишгоҳи (славянии) Русияву Тоҷикистон чорабинӣ бо иштироки устодон ва донишҷӯёни донишгоҳ баргузор гардид.
«Масъалае, ки имрӯз тамоми минтақаи ҷаҳонро ба ташвиш овардааст- ин пайвастани ҷавонон ба гурӯҳҳои террористию экстремистӣ мебошад. Ҷавонони ба чунин гурӯҳҳои шомилшуда на рукнҳои ҷамъиятиро медонанду на саводи сиёсӣ ва динӣ доранд. Агар мо дар якҷоягӣ камари ҳиммат баста, барои ин масхала дар байни ҷавонон корҳои фаҳмондадиҳӣ гузаронем, бовари комил дорам, ки натиҷаи хуб ба даст меорем»,-зикр дошт мудири кафедраи матбуот ва алоқа бо ҷомеаи донишгоҳи мазкур Шариф Муллоев.