Дурнамои Агентии таъминоти амволи махсус барои соли 2016

Душанбе, 21.01.2016 (АМИТ «Ховар»).- Масъулини Агентии таъминоти амволи махсуси назди Ҳукумати Ҷумҳурии Тоҷикистон, барои таъминоти Қувваҳои Мусаллаҳи мамлакат бо маводи хӯрокворӣ, либоси низомӣ, пойафзолу амволи шайъӣ ва дигар маҳсулоти зарурӣ тадбирҳои судмандро амалӣ менамоянд.
Дар ҷаласаи Агентии таъминоти амволи махсус, пеш аз ҳама, таъминоти ҷузъу томҳои сохторҳои низомии мамлакат дар соли 2015 мавриди таҳлилу натиҷагирӣ қарор гирифта, нақшаву дурнамои он барои соли 2016 ҳамаҷониба баррасӣ гардид.
Зикр гардид, ки Президенти Ҷумҳурии Тоҷикистон-Сарфармондеҳи Олии Қувваҳои Мусаллаҳ ба ғайр аз меъёри муқарраргардидае, ки барои таъминоти ҳайати шахсии ҷузъу томҳо пешбинӣ шудааст, иловатан ҳамасола новобаста аз баргузории иду ҷашнҳо барои таъмин намудани хизматчиёни ҳарбӣ бо маҳсулоти зарурӣ ва дигар маводи хӯрокворӣ тадбирҳои лозимиро роҳандозӣ менамояд.
Зимни баррасӣ ва муҳокимаи масъалаҳои соҳавӣ зикр шуд, ки Агентии таъминоти амволи махсус дар тобеияти худ корхонаҳои гуногуни истеҳсолӣ ва хоҷагиҳои ёрирасонро доро мебошад ва дар онҳо асосан маҳсулоти кишоварзӣ кишт шуда, чорводориву паррандапарварӣ, мурғ ва моҳипарварӣ рушд мекунад.
Тавре ки зикр ёфт, бо ташкили корхонаи дӯзандагӣ, ки наздики 200 нафар бо ҷойи кор таъмин гаштаанд, масъулини агентӣ азм доранд миқдори муайяни таъминоти либосро барои хизматчиёни ҳарбӣ дар ин корхона ба роҳ монанд. Дар ҷаласа, инчунин вобаста ба сифати истеҳсоли пойафзол, либос ва дигар маҳсулот мубодилаи афкор сурат гирифт.