Эъломияи Душанбе оид ба волияти қонун

Душанбе, 28.01.2016 (АМИТ «Ховар»).-Тавре ки вазири адлияи мамлакат Рустам Шоҳмурод имрӯз, 28 январ зимни нишасти матбуотӣ иттилоъ дод, бо мақсади баланд бардоштани маърифати ҳуқуқӣ Форуми якуми миллӣ оид ба волияти қонун дар шаҳри Душанбе баргузор гардид, ки дар ҷараёни он масъалаҳои ҳуқуқи миллӣ ва байналмилалӣ, ҳамкории институтҳои давлатӣ ва ғайридавлатӣ, ҷабҳаҳои муҳимтарини рушди ҳуқуқ дар ҷаҳони муосир мавриди муҳокима қарор дода шуданд. Намояндагони мақомоти давлатӣ, ҳуқуқшиносон, олимон, намояндагони созмонҳои байналмилалӣ ва ҷомеаи шаҳрвандӣ дар Форуми мазкур ба масъалаҳои ислоҳоти судӣ-ҳуқуқӣ, дастрасӣ ба адолати судӣ, уҳдадориҳои байналмилалӣ дар самти ҳифзи ҳуқуқи инсон, масоили мубрами қонунгузории гражданӣ ва соҳибкорӣ таваҷҷуҳ зоҳир карда, Эъломияи Душанбе оид ба волияти қонун дар Ҷумҳурии Тоҷикистонро қабул карданд.
Хотиррасон бояд шуд, ки мутобиқи Амри Президенти мамлакат аз 15-уми сентябри соли 2011 вазорату идораҳо, ташкилоту муассисаҳо, мақомоти иҷроияи ҳокимияти давлатии вилоятҳо ва шаҳру ноҳияҳои ҷумҳурӣ аз даҳаи дуюми моҳи январ то даҳаи дуюми моҳи феврали соли равон вобаста ба фаъолияти меҳнатӣ дар давраи соли 2015 барои расонаҳои иттилоотии ватаниву хориҷӣ нишастҳои матбуотӣ баргузор мекунанд.