Ҷиноятҳои дуздӣ дар Қурғонтеппаю Ёвон

Душанбе, 08.01.2016. (АМИТ «Ховар»). -7-уми январ сокини 25-солаи ш. Қурғонтеппа аз ҷониби кормандони милитсия бо ҷинояти дуздӣ дастгир гардид. Муайян шуд, ки гумонбаршуда 6 -уми январ вориди корхонаи букмекерии «Рахш», воқеъ дар ш. Қурғонтеппа шуда, аз он ҷо маблағи пулӣ дар ҳаҷми 8000 сомонӣ ва 4 сабти хотираи компютер (процессор)-ро дуздидааст. Ҳамчунин дастгиршуда дар дуздии 4 телефони мобилии тамғаи «Самсунг» ва 2 аксбардори тамғаи «Нокиа» ва «Самсунг», бо арзиши умумии 7000 сомонӣ аз мағозаи хусусии соҳибкор, сокини 28-солаи ноҳияи Бохтар гумонбар дониста мешавад.
Дар ноҳияи Ёвон низ сокини 20-солаи ҳамин ноҳия бо ҷурми дуздӣ дастгир гардид. Муайян шуд, ки гумонбаршуда моҳи декабри соли 2015 бо роҳи пинҳонӣ аз хонаи истиқоматии сокини 47-солаи ноҳияи Ёвон маблағи пулии зерин; 3200 евро, 1000 доллари амрикоӣ, 253 ҳазор рубли русӣ ва 8000 сомониро дуздида, аз ҷойи ҳодиса ғайб задааст.
Нисбат ба гумонбаршудагон парвандаи ҷиноятӣ оғоз гардида, тафтиш идома дорад.