Мусодираи маводи нашъадор аз шахси бо ин ҷурм судшуда

Душанбе, 18.01.2016. (АМИТ «Ховар»). — 16-уми январи соли равон дар шаҳри Душанбе зимни гузаронидани чорабиниҳои фаврӣ-ҷустуҷӯӣ сокини 43-солаи ноҳияи Ҳисор, ки пеш бо моддаи 200 қисми 3 Кодекси ҷиноятии Ҷумҳурии Тоҷикистон суд шудааст, бо гумони муомилоти ғайриқонунии маводи мухаддир аз ҷониби кормандони милитсия дастгир гардид. Дар вақти кофтукови шахсӣ аз ӯ 3 килою 404 грамм маводи нашъадори афюн дарёфт ва мусодира шуд.
Ҳамчунин 17- уми январ кормандони милитсия бо гумони ғайриқонунӣ нигоҳ доштани маводи нашъадор сокини 29-солаи ноҳияи Рӯдакиро дастгир намуданд. Дар вақти кофтукови мошини шахсии гумонбаршуда, тамғаи “Хундай Старекс”, 150 грамм маводи нашъадори ҳашиш ва 936 грамм маводи нашъадори сахттаъсири героин дарёфт ва мусодира шуд.
Вазни умумии маводи дарёфт ва мусодирашуда 4 килою 490 граммро ташкил медиҳад.
Нисбат ба гумонбаршудагон парвандаҳои ҷиноятӣ оғоз шуда, тафтиш дар ин самт идома дорад.