Операторон ва провайдерон уҳдадоранд, то ба волидайн маълумоти ройгон ироа намоянд

Душанбе, 27.01.2016.(АМИТ „Ховар“).- Вакилони палатаи поёнии Парлумони Тоҷикистон 27 январ ба лоиҳаи Қонуни Ҷумҳурии Тоҷикистон „Дар бораи масъулияти падару модар дар таълиму тарбияи фарзанд“ илова ворид намуданд. Тибқи он минбаъд операторон ва провайдерони хизмати алоқаи барқӣ уҳдадоранд, ки дар асоси дархости падару модарон доир ба истифодаи фарзандони онҳо аз шабакаи Интернет маълумоти ройгон ироа намоянд.
Абдуҳалим Ғаффоров -вакили Маҷлиси намояндагон дар назди вакилони Парлумон гуфт, ки ин тадбир бо мақсади тақвияти назорат аз болои фарзандон аз сӯи волидайн дар мавриди истифодаи алоқаи барқӣ, хусусан сомонаҳои интернетие, ки дар онҳо зӯроварию фаҳш, ифротгароию терроризм ва дигар зуҳуроти нангин тарғиб мегарданд, андешида шудаанд. Бояд тазаккур дод, ки ҳафтаи гузашта вакилони палатаи поёнии Парлумони мамлакат дар робита ба ин масъала ба лоиҳаи Қонуни Ҷумҳурии Тоҷикистон „Дар бораи алоқаи барқӣ“ ҳам иловаҳо ворид намуданд.