Семинар: Истифодаи мақсадноки маблағҳои сарикасӣ дар муассисаҳои таҳсилоти умумӣ

Душанбе, 28.01.2015. (АМИТ «Ховар»).- Дар партави Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон дар толори фарҳангии муассисаи таҳсилоти умумии №1-и ноҳияи Восеъ бо ташаббуси Вазорати маориф ва илми Ҷумҳурии Тоҷикистон семинари методӣ барои директорони муассисаҳои таълимӣ дар мавзўи «Оид ба мақсаднок истифодабарии маблағҳои сарикасӣ дар муассисаҳои таҳсилоти умумӣ» доир гардид.
Намояндаи Вазорати маориф ва илми Ҷумҳурии Тоҷикистон Санавбар Хоҷаева ба директорони муассисаҳои таълимӣ оид ба роҳҳои банақшагирии маблағи сарикасӣ ва нақшабандии самараноки он, низоми маблағгузории сарикасӣ ва такмили молияи муассисаҳои таълимӣ маслиҳатҳои муфид пешниҳод намуд.
С. Хоҷаева ҳамчунин таъкид намуд, ки ба низоми маблағгузории сарикасӣ гузаштани муассисаҳои таълимии кишвар як падидаи наву судманде маҳсуб мешавад, ки мухторияту соҳибихтиёрии маъмурияти мактабҳоро дар масъалаи молиявӣ пурра таъмин менамояд, зеро Пешвои миллат дар Паёми имсолаи хеш ба Маҷлиси Олӣ гуфт: «Бо мақсади иҷрои ҳадафҳои Стратегияи миллии рушд ислоҳот ва навсозӣ дар соҳаи маориф бомаром идома дорад. Ҳоло муассисаҳои таҳсилоти миёнаи умумии кишвар пурра ба маблағгузории сарикасӣ гузашта, фаъолияти низоми молиявӣ дар ин муассисаҳо ба танзим дароварда шудааст.
Вобаста ба ин вазоратҳои молия, маориф ва илмро зарур аст, ки барои давра ба давра ба маблағгузории сарикасӣ гузаронидани зинаҳои таҳсилоти томактабӣ, ибтидоӣ, миёна ва олии касбӣ чораҷўӣ намоянд.