Соли 2015 дар Душанбе 2 ҳазору 983 ҷойи корӣ фароҳам оварда шуд

Душанбе, 28.01.2016. (АМИТ «Ховар»). — Тайи соли 2015 дар шаҳри Душанбе 83 корхонаю коргоҳҳои саноатӣ мавриди истифода қарор гирифта, 2 ҳазору 983 нафар бо кор таъмин гардид, хабар дод муовини раиси шаҳри Душанбе Шуҳрат Мақсудзода дар нишасти матбуотӣ.
Муовини раиси шаҳр изҳор дошт, ки дар давраи ҳисобот бо ибтикори марказҳои шуғли аҳолӣ 4 ҳазору 73 нафар шаҳрвандон дар корхонаю муассисаҳо бо кор таъмин шуданд.
Ғайр аз ин аз ҳисоби бунёди муассисаю корхонаҳои нав ва рӯи кор овардани иқтидорҳои ҷадид дар пойтахт 32 ҳазор ҷойи корӣ фароҳам оварда шуд, ки ин 104,9 фоизи нақшаро ташкил медиҳад.