Таъмини 768 нафар бо кори доимӣ тавассути агентии шуғли аҳолӣ

Б.Ғафуров, 16.01.2016. ( АМИТ “Ховар”).- Барои таъмини аҳолии ноҳия дар давоми соли гузашта аз ҷониби бахши Агентии шуғли аҳолии ноҳияи Бобоҷон Ғафуров дар миқёси ноҳия 15 маротиба ярмаркаҳои ҷойҳои корӣ доир гардид.
Тавре ки масъулин аз мақомоти маҳаллии ноҳия иттилоъ доданд, тибқи “Барномаи мусоидат ба шуғли аҳолӣ дар соли 2015” дар ноҳия таъсиси 7390 ҷои корӣ пешбинӣ гардида, дар асл 7393 ҷойи корӣ таъсис дода шуда, 15 маротиба ярмаркаҳои ҷойҳои корӣ гузаронида шуданд.
Илова бар ин аз шумораи умумии муроҷиаткунандагон 370 ҷавон ба курсҳои касбомӯзӣ фиристода шуда, аз ҳисоби бекорони дар қайд буда 768 нафар бо корҳои доимӣ таъмин шуданд.
Ҳамчунин дар ин давра ба 56 корҷӯй барои ташкили корҳои фардӣ қарзҳои хурди имтиёзноки бефоиз дода шуданд.